Fiara nova
Tradizione è mudernità
Fiara nova : tradizione è mudernità
Natu in u 2019 da a passione di qualchì cantadore, issu gruppu face, pian’ pianinu a so strada in l’universu di u cantu corsu. Un gruppu chì hà da riprisentà a so isula u 22 di dicembre in Bastia à l’occasione di u Liet internaziunale.
Semu in a pieve di u Rustinu, in Castagniccia. Hè quì ch’elli stanu i fratelli Anghjulu Dumenicu è Ghjuvan Filippu Giovanetti. Studienti, anu cunvintu d’altri amichi : Lisandru Bonini (Aiacciu), Dimitri Olmeta (Muratu) è Ghjuvan Battista Gomez, sunadore di ghitarra (Aiacciu). « Ci simu ritruvati tutti inseme, spiega u primu, è à pocu à pocu, avemu cantatu inseme è spertutu tanti mumenti. Un ghjornu, ci simu dettu : perchè micca un gruppu ? È l’affare s’hè fatta. Per a scelta di u nome, avemu pensatu à una fiara, quella chì chjarisce l’avvene... »
Un gruppu cù membri abbastanza ghjovani, chì hà cercatu, trà cantu tradiziunale (e paghjelle di a pieve sò assai rinumate, cum’è, d’altronde, u cantu sacru) è più mudernu, à fà a so strada intornu à u so propiu filu. « Parlemu di a nostra vista di u mondu è di a nostra isula, aghjusta u cantadore, a sucetà corsa oghjinca, a so piazza in u mondu, dinò e muntagne è a natura, chì sò testimonii impurtanti per noi. »
Un primu dischettu l’annu scorsu
Strada facendu, u gruppu hà esciutu, dui anni fà, u so primu dischettu : « U focu di a vita ». Issu dischettu di quattordeci tituli, hè un mischiu di pulifunie è canzone muderne è strumentale (batteria, ghitarra, viulinu), ciò chì face, ci vole à dilla, a particularità di l’inseme. Cusì, si passa da una paghjella à una pulifunia più oghjinca è ancu una munudia à una decina di canzone. Ci si trova, per indettu, « Un dui d’aostu » chì tratta di a guerra di u quattordeci è ancu d’altre cum’è « S’ellu era u to figliolu », una canzona in umaggiu à i tutti quelli chì piglianu risichi per parte da u so paese è cercà un pezzu di benestà altrò...Duie tematiche ch’ùn sò tantu faciule à trattà. Anghjulu Dumenicu è Ghjuvan Filippu Giovanetti anu cumpostu a maiò parte di i tituli. Stefanu Casalta, Ghjuvan Claudiu Acquaviva è Battista Cappai anu purtatu dinò a so grinfia. È per ciò chì tocca à i scritti Patrizia Gattaceca, Ghjuvan Iviu è Marcellu Acquaviva, Ornella Nobili o Francescu Luciani. « Ùn Ci hè priurità trà u tradiziunale è u cantu mudernu. Ci piacenu i dui è passemu da unu à l’altru senza prublemi. »
Una volta à settimana, i membri si ritrovenu in Corti per travaglià canti è canzone. « Dopu, ci hè di sicuru, un travagliu persunale.Per e pulifunie, ci hè un travagliu cumunu. Ci ritruvemu per cantà è accuncià bè e voce, masimu per ciò chì tocca à e pulifunie muderne. »
U Liet internaziunale di e lingue minuritarie un 22 di nuvembre in Bastia.
U gruppu hà giratu cù issu primu dischettu in Cismonte, Pumonte è ancu à u paese bascu. Hà ancu participatu à i scontri pulifonichi di Calvi. Un « clip », Paglia Orba, diffusatu nantu à e rete suciale, ci permette di misurà a qualità d’inseme di u gruppu. « Hè una pulifunia muderna ma arradicatu à qualcosa di più anzianu. » Un talente rimarcatu chì permette, oghje, à « Fiara nova », di participà, nanzu à un secondu dischettu di ghjennaghju, à u famosu cuncorsu di u Liet internaziunale di e lingue minuritarie un 22 di nuvembre in Bastia. « Avemu mandatu una candidatura qualchì mese fà, eppo simu stati ritinuti. »
Issu ghjornu quì, a squadra di a « Fiara Nova » hà da prisentà « Qualcosa di tè », issa pulifunia trà sacru è prufanu. L’occasione, perchè micca, di passà cù u listessu successu daretu à Ghjacumu Culioli è Doria Ousset, ch’anu vintu tramindui issu cuncorsu.
F.P.
Natu in u 2019 da a passione di qualchì cantadore, issu gruppu face, pian’ pianinu a so strada in l’universu di u cantu corsu. Un gruppu chì hà da riprisentà a so isula u 22 di dicembre in Bastia à l’occasione di u Liet internaziunale.
Semu in a pieve di u Rustinu, in Castagniccia. Hè quì ch’elli stanu i fratelli Anghjulu Dumenicu è Ghjuvan Filippu Giovanetti. Studienti, anu cunvintu d’altri amichi : Lisandru Bonini (Aiacciu), Dimitri Olmeta (Muratu) è Ghjuvan Battista Gomez, sunadore di ghitarra (Aiacciu). « Ci simu ritruvati tutti inseme, spiega u primu, è à pocu à pocu, avemu cantatu inseme è spertutu tanti mumenti. Un ghjornu, ci simu dettu : perchè micca un gruppu ? È l’affare s’hè fatta. Per a scelta di u nome, avemu pensatu à una fiara, quella chì chjarisce l’avvene... »
Un gruppu cù membri abbastanza ghjovani, chì hà cercatu, trà cantu tradiziunale (e paghjelle di a pieve sò assai rinumate, cum’è, d’altronde, u cantu sacru) è più mudernu, à fà a so strada intornu à u so propiu filu. « Parlemu di a nostra vista di u mondu è di a nostra isula, aghjusta u cantadore, a sucetà corsa oghjinca, a so piazza in u mondu, dinò e muntagne è a natura, chì sò testimonii impurtanti per noi. »
Un primu dischettu l’annu scorsu
Strada facendu, u gruppu hà esciutu, dui anni fà, u so primu dischettu : « U focu di a vita ». Issu dischettu di quattordeci tituli, hè un mischiu di pulifunie è canzone muderne è strumentale (batteria, ghitarra, viulinu), ciò chì face, ci vole à dilla, a particularità di l’inseme. Cusì, si passa da una paghjella à una pulifunia più oghjinca è ancu una munudia à una decina di canzone. Ci si trova, per indettu, « Un dui d’aostu » chì tratta di a guerra di u quattordeci è ancu d’altre cum’è « S’ellu era u to figliolu », una canzona in umaggiu à i tutti quelli chì piglianu risichi per parte da u so paese è cercà un pezzu di benestà altrò...Duie tematiche ch’ùn sò tantu faciule à trattà. Anghjulu Dumenicu è Ghjuvan Filippu Giovanetti anu cumpostu a maiò parte di i tituli. Stefanu Casalta, Ghjuvan Claudiu Acquaviva è Battista Cappai anu purtatu dinò a so grinfia. È per ciò chì tocca à i scritti Patrizia Gattaceca, Ghjuvan Iviu è Marcellu Acquaviva, Ornella Nobili o Francescu Luciani. « Ùn Ci hè priurità trà u tradiziunale è u cantu mudernu. Ci piacenu i dui è passemu da unu à l’altru senza prublemi. »
Una volta à settimana, i membri si ritrovenu in Corti per travaglià canti è canzone. « Dopu, ci hè di sicuru, un travagliu persunale.Per e pulifunie, ci hè un travagliu cumunu. Ci ritruvemu per cantà è accuncià bè e voce, masimu per ciò chì tocca à e pulifunie muderne. »
U Liet internaziunale di e lingue minuritarie un 22 di nuvembre in Bastia.
U gruppu hà giratu cù issu primu dischettu in Cismonte, Pumonte è ancu à u paese bascu. Hà ancu participatu à i scontri pulifonichi di Calvi. Un « clip », Paglia Orba, diffusatu nantu à e rete suciale, ci permette di misurà a qualità d’inseme di u gruppu. « Hè una pulifunia muderna ma arradicatu à qualcosa di più anzianu. » Un talente rimarcatu chì permette, oghje, à « Fiara nova », di participà, nanzu à un secondu dischettu di ghjennaghju, à u famosu cuncorsu di u Liet internaziunale di e lingue minuritarie un 22 di nuvembre in Bastia. « Avemu mandatu una candidatura qualchì mese fà, eppo simu stati ritinuti. »
Issu ghjornu quì, a squadra di a « Fiara Nova » hà da prisentà « Qualcosa di tè », issa pulifunia trà sacru è prufanu. L’occasione, perchè micca, di passà cù u listessu successu daretu à Ghjacumu Culioli è Doria Ousset, ch’anu vintu tramindui issu cuncorsu.
F.P.
