Praticalingua sbarca in Aiacciu !
A struttura dedicata à a prumuzione è l’amparera di a lingua è a cultura corsa,....
Praticalingua sbarca in Aiacciu !
A struttura dedicata à a prumuzione è l’amparera di a lingua è a cultura corsa, creata in u 2016, era sin’à d’avà in parechji lochi di Corsica. Di ghjennaghju scorsu, puderia esse ufficializata in Aiacciu.
Quand’ella hè creata nove anni fà, in Bastia da unepochi di passiunati di a lingua è a cultura corsa, a struttura « Praticalingua », chì vole prumove è sopratuttu fà campà a lingua corsa in tutti i duminii, etablisce cum’è scopu a sparghjera in tutta l’isula. Nove anni dopu, esiste in u centru Corsica (Corti), u Capicorsu, u Purtivechjacciu, a Balagna, u Nebbiu, a Piaghja Urientale è Bastia induve ella hè stata principiata cù Lisandru De Zerbi, prufessore di lingua corsa.
Più di seicentu aderenti
Oghje, ci vole à cuntà à pocu pressu, più di 600 aderenti in tutta l’isula. Mancava u rughjone aiaccinu. Di regula, a struttura divaria esse ufficializata di ghjennaghju-à u più cortu- o da quì à qualchì mese. À l’iniziativa d’issu prughjettu novu, Maria Francesca Canavelli, chì travaglia in a cumunicazione. « Sò pertuta d’un custattu, spiega a ghjuvanotta, ùn ci hè, da vera, un spaziu in Aiacciu induve a lingua hà a so piazza. Per contu meiu, sò bislingua ma aghju vistu, dopu à i me studii, ch’aviu qualchì difficultà à parlà. È ùn eru sola. Partendu di què, masimu ch’ùn ci era ancu a struttura « Praticalingua » in Aiacciu, aghju cuntattatu à Lisandru De Zerbi è a squadra di Bastia, chì gestisce l’inseme di tutti e strutture di Corsica, per mettene una in piazza in Aiacciu. »
« Una logica di squadra »
Maria Francesca cummencia à cuntattà ghjente capace d’assicurà attività in lingua corsa : amparera principianti è cunfirmati, puesia è scrittura, viulinu, storia, ghitarra, cantu per i zitelli è i maiò, pulifunia, cantu sacru, teatru per i zitelli, spassighjate in muntagna... Ma nanzu à tuttu, ci vulia à truvà un lucale è appruntà un bugettu. « A struttura hè gestita di a listessa manera in tutti i « Praticalingua » di Corsica, aghjusta a capimachja, « l’intervenanti anu tutti a listessa prestazione cum’è u prezzu per l’aderenti, i duminii sò diversi è circhemu à mantene un certu spiritu. Ci hè una logica di spartera è di squadra. Ma nanzu à tutti, ci vulia à truvà un bugettu è un lucale. »
Apertura di ghjennaghju ?
Un lucale chì puderia esse in a vechja cità d’Aiacciu. È per ciò chì tocca à u bugettu, Maria Francesca avia chjamatu à un’adunita maiò u 19 di nuvembre, cù l’associu « Ricordi di Petru Pà », è parechji militanti linguistichi à u « café de Flore » in a stretta Fesch. U tuttu da avè qualchì soldu da principià a so attività. « Ci aspettavamu à 250 persone, ci n’hè statu u doppiu. Anu cantatu è sò ghjunti à scambià cù mecu nantu à stu prughjettu. Hè una bona è u segnu ch’elli ci sò sempre ghjente passiunati di lingua corsa à ancu pronti à dà mi una manu, ch’eu partu solu in issu prughjettu quì. »
Per principià, a respunsevule puderà cuntà nantu à tercani, ognunu in u so duminiu è nantu à tematiche dighjà sviluppate altrò...Ghjuvan Marcu Leca, Petru Antò Beretti (lingua corsa), Vital Negroni (ghitarra), Anaïs Vincileoni (teatru), Petru Canon (puesia), Alanu Scipilliti (spassighjata in muntagna)... Forse, una quindicena, un numaru chì puderia cresce pian’, pianinu.
Un scopu di 200 aderenti
Ma, à più o menu longu andà, forse d’altre tematiche di a vita ughjinca puderanu esse pruposte : numericu, infurmaticu, scacchi, sosule, scopa, dipenderà di u numaru d’aderenti. « Pensu chè l’iniziu serà forse appena duru ma, subbitu averemu sustegnu. Ci hè una dumanda in tutti sti duminii è aghju avutu parechje chjame da assai ghjente chì volenu purtà a so petra o assicurà una permanenza. Cù un’adesione à mese, a ghjente puderà participà à tutti l’attelli chì li cunvene... Speremu di ghjunghje à 200 aderenti. »
S’è tuttu và bè, « Praticalingua » Aiacciu, puderia apre e so porte di ghjennaghju. Una struttura spiccata, cum’è altrò, in parechje sale dedicate à l’amparera di u corsu, tutti l’attelli chì sò privisti è dinò, un bancu è un spaziu à l’intrata induve si puderà piglià un caffè è scambià, in lingua corsa, sicura !
F.P.
photo : F.P