« Un ghjornu, una canzona » : da a cronaca à u libru.

« Un ghjornu, una canzona » : da a cronaca à u libru.

Marc’Andria Castellani, u famosu animatore d’Ici RCFM, hà esciutu, qualchì tempu fà, un libru dedicatu à a so emissione « Un ghjornu, una canzona. » Una manera di cuntà, di manera più literaria, a storia di u cantu corsu.

Dapo dece anni, l’animatore Marc’Andria Castellani hà fattu a so strada nant à l’onde di a Frequenza Morra. S’ellu hè cunnisciutu, oghje, per a so emissione-cronaca « Storia », hà fattu i so primi passi ed hà ottenutu, ci vole à dilla, un successu maiò. Cusì, è dopu à dece anni, l’hè venuta l’idea di traduce tutte e so cronache à nivellu literariu per dà nascita, qualchì settimana fà, à u libru di seicentu pagine. « À l’iniziu, spiega l’autore, ci hè u percorsu à traversu à tutte isse cronache chì cuntavanu, d’una parte, a storia di e canzone, è d’un altra, a mo vita di musicante è quella dinù di u mondu culturale à fiancu à tanti cantadori rinumati cum’è Ghjuvan Paulu Poletti, Anghjula Potentini, Petr Guelfucci, è tanti altri...In dece anni, aghju avutu una massa impurtante d’infurmazione è di racolte ch’aghju vulsutu mette nan à libru. »
Marc’Andria Castellani cuncepisce, dunque, à partesi di issi dece anni, u so libru, cù e canzone chì l’anu marcatu u più, chì anu marcatu è sulcatu à tempu, a vita di i Corsi dapoi anni è anni Postu ch’ellu si pò parte da luntanu…

Una testimunianza storica
« U libru si pò capisce à trè nivelli, aghjusta l’animatore, e sturiette è stalvatoghj in giru à e canzone. U secondu nivellu, ghjè a storia di u cantu corsu, cù analis chì mettenu in vale i cuntesti di l’epica. In fine, terzu nivellu hè quellu d’avè una storia di a Corsica arrimbata nantu à e puesie è scritti di e canzone. Hè, in fattu, una testimunianza storica di gra valore chì prmette di capisce prublematiche di l’epica è dinù a mentaliità di a ghjente chè i tempi scambianu. »
Eserciziu difficiule nantu à decine di canzone è un libru di più di quarucentu pagine, a scelta di quelle mintuate. È quì, l’autore ùn hà sceltu quelle chì li piacianu u più ma hà sopratuttu circatu à ritene quelle chì eranu riprisentative di a Corsica d’eri è d’oghje. « Parechji canti sò simbolichi. Pensu à Terzetti di u Piuvanu Turchini, hè una struttura chì ci face cullà sin’à medievu liata à a scrittura di Dante Allighieri è un cuntenutu chì conta a resistenza di i Paulisti mandati in Tulò. Pensu dinù à u lamentu di u castagnu chì parla di a Corsica tradiziunale ciuttata in prublematiche muderne. In fine, si pò mintuà u famosu « Chì fà », di i fratelli Vincenti, un’interrugaezione esistenziale per i ghjovani corsi di l’anni settanta di pettu à un sistema puliticu chjosu. »

Un annu è mezu di scrittura
Di issi dece anni d’emissione, Marc’Andria Castellani n’hà fattu un libru dopu à un annu è mezu di scrittura nantu à u listessu filu ma cù spressione diverse. « Inde a canzona, si parla sopratuttu di u cuntestu mentre ch’in u libru, ci sò di più analisi. Hè u filu storicu chì piglia a suprana. » Scrive, un arte induve l’autore face valè un certu talente. Masimu in lingua nustrale. « Hè un libru ch’aghju vulsutu fà solu, scrittura, edizione, senza dumandà aiutu. Un’opera 100 % in lingua corsa per mustrà chè issa lingua quì t’hà a so piazza in a sucetà d’oghje.Una scelta chì s ghjustificheghja cù u piacè di maneghjà a lingua, a libertà di scrittura ch’ella vi dà u corsu, una spressione più linda chè u francese per parlà d’isse tematiche. In fine, rende a lingua à a lingua...Hè una manera di rende à populu, ciò chì l’appartene : a so lingua. »
D’issu libru, Marc’Andria Castellani n’hà esciutu 100 esempiarii pertuti i quattru è trè sette. Li tocca, dunque, à ripiglià l’edizione. L’autore face, avà, u giru di Corsica per fà ne a prumuzione. Frà tempu, l’emissione cuntinueghja. Aspettendu, perchè micca, una seguita di « Un ghjornu, una canzona. »

F.P.Crédit photo : Philippe Peraut