Murescu : un locu di spartera numericu in lingua corsa
U 19 di ghjinnaghju, nascia Murescu, a prima reti suciali cuncipita in lingua nostra cù u scopu d'adduniscia tutti i Corsi : .....
Murescu : un locu di spartera numericu in lingua corsa
U 19 di ghjinnaghju, nascia Murescu, a prima reti suciali cuncipita in lingua nostra cù u scopu d’adduniscia tutti i Corsi : quilli chì stani quì è quilli chì campani in altrò. Un billissimu spaziu chì cresci pianu pianu è ch’accogli ogni ghjornu membri novi. Da sapenni di più, emu postu unipochi di dumandi à Stefanu Barbagelata, prufissori di i scoli bislingui è criatori di Murescu…
- Comu hè nata l’idea di crià una reti suciali in lingua corsa pà i Corsi di quì è di u mondu sanu ?
Vidia ogni ghjornu ghjente chjachjarà nantu à e rete suciale cù poche parolle in corsu… Vidia dinù Corsi di quì è d’altrò staccati da e fruntiere è mai adduniti chì lingue è paesi sfarenti sò filtri chì impediscenu a ghjente di scuntrassi nantu à e rete suciale, diceraghju, tradiziunale… Allora aghju avutu l’idea è u scopu d’addunì i Corsi di u mondu sanu aduprendu u più pussibule a lingua corsa cum’è vettore di cumunicazione… Sicura, si pò parlà altre lingue, ma u scopu ferma di pruvà à scrive in corsu.
- Chì si pò fà annantu à Murescu ?
Nantu à Murescu, si pò publicà posti publichi cum’è nantu à Facebook, ch’elli sianu scritti, ritratti, pagine sparte o ancu videò ma si pò dinù chjachjarà in privatu, leghje u bloggu (è ancu scriveci), participà à un foru, creà un gruppu da addunì a ghjente sottu à una « bandera » cumuna.
- Chì cerca à purtà di più Murescu di pettu à i grandi reti suciali mundializati ?
Murescu ùn cerca ghjustappuntu à purtà nunda in più, chì tuttu hè fattu… Ma circhemu solu à aduprà qualcosa chì esiste digià ma in lingua corsa. S’è no circhemu qualcosa in più, serebbe solu à aiutà quelli chì volenu parlà corsu à parlà…
Murescu hè un locu in più impegnatu di lingua corsa cum’è parechji… l’associu Praticalingua, emissione radiufoniche cum’è « Dite a vostra », l’associu Fiura Mossa è tant’altri …
Ciò chì ghjè impurtante assai, à contu nostru, hè di multiplicà e pruposte è tuccà sempre un numeru più impurtante di cristiani.
Pinsemu ch’ell’hè più faciule di principià in lingua corsa cù u scrittu postu chì si pò piglià u so tempu, riflette, sguassà ecc.. è ch’omu si senterà menu vergugnosu.
Tutti quelli chì anu pruvatu un ghjornu à parlà corsu sanu quant’ell’hè difficiule postu chì c’hè sempre un aiattolà di a lingua sopr’à locu per criticà !
- Annantu à Murescu, quand’omu ricevi una dumanda d’amicizia, s’hà dui pussibulità : « accittà » è « mancu per ride »… Quì, si vedi chì a risa è a macagna sò elementi di primura…
Ha iè ! A macagna hà una piazza maiò in u spiritu corsu. Dunque ci vulia à falli una piazza ind’è Murescu ! È d’altre macagne sò à ghjunghje… ma pè cunnoscele.. ci vole à scrivesi !
- Qualessi sò i vostri prughjetti è spiranzi pà l’avvena di stu spaziu di sprissioni è di spartera ?
Allora digià, hè previstu un spaziu « impieghi » per prupone o circà impieghi in u mondu sanu.
Serebbe più chè bè ch’un giovanu corsu chì vole vultà in Corsica o viaghjà in America sia in capacità nantu à Murescu di truvà un impiegu qualessu sia u locu di a pianetta duv’ellu vole andà !
Un altru prugettu maiò hè di sviluppà Murescu ghjustappuntu for di Corsica.
Patrick Ottomani, presidente di l’Associu di i Corsi d’America seguita Murescu dapoi u principiu è seranu scritti da quì à pocu i membri di st’associu nantu à u situ. Ci permetterà di cuntrastà cù i nostri cumpatriotti americani !
Per elli, serà una manera d’ùn scurdassi di a filetta ! Vogliu dì di mantene una leia cù a so lingua è soprattuttu cù u so populu !
In Parigi è in altrò, ci sò usterie, caffè duve i Corsi anu un piacè tamantu à ritruvassi, à adduniscesi… Avà averanu ancu Murescu da mantene sta leia in casa… È Diu sà ch’in ‘ssi tempi scuri… in casa… ci simu spessu !
Brandon Andreani
U 19 di ghjinnaghju, nascia Murescu, a prima reti suciali cuncipita in lingua nostra cù u scopu d’adduniscia tutti i Corsi : quilli chì stani quì è quilli chì campani in altrò. Un billissimu spaziu chì cresci pianu pianu è ch’accogli ogni ghjornu membri novi. Da sapenni di più, emu postu unipochi di dumandi à Stefanu Barbagelata, prufissori di i scoli bislingui è criatori di Murescu…
- Comu hè nata l’idea di crià una reti suciali in lingua corsa pà i Corsi di quì è di u mondu sanu ?
Vidia ogni ghjornu ghjente chjachjarà nantu à e rete suciale cù poche parolle in corsu… Vidia dinù Corsi di quì è d’altrò staccati da e fruntiere è mai adduniti chì lingue è paesi sfarenti sò filtri chì impediscenu a ghjente di scuntrassi nantu à e rete suciale, diceraghju, tradiziunale… Allora aghju avutu l’idea è u scopu d’addunì i Corsi di u mondu sanu aduprendu u più pussibule a lingua corsa cum’è vettore di cumunicazione… Sicura, si pò parlà altre lingue, ma u scopu ferma di pruvà à scrive in corsu.
- Chì si pò fà annantu à Murescu ?
Nantu à Murescu, si pò publicà posti publichi cum’è nantu à Facebook, ch’elli sianu scritti, ritratti, pagine sparte o ancu videò ma si pò dinù chjachjarà in privatu, leghje u bloggu (è ancu scriveci), participà à un foru, creà un gruppu da addunì a ghjente sottu à una « bandera » cumuna.
- Chì cerca à purtà di più Murescu di pettu à i grandi reti suciali mundializati ?
Murescu ùn cerca ghjustappuntu à purtà nunda in più, chì tuttu hè fattu… Ma circhemu solu à aduprà qualcosa chì esiste digià ma in lingua corsa. S’è no circhemu qualcosa in più, serebbe solu à aiutà quelli chì volenu parlà corsu à parlà…
Murescu hè un locu in più impegnatu di lingua corsa cum’è parechji… l’associu Praticalingua, emissione radiufoniche cum’è « Dite a vostra », l’associu Fiura Mossa è tant’altri …
Ciò chì ghjè impurtante assai, à contu nostru, hè di multiplicà e pruposte è tuccà sempre un numeru più impurtante di cristiani.
Pinsemu ch’ell’hè più faciule di principià in lingua corsa cù u scrittu postu chì si pò piglià u so tempu, riflette, sguassà ecc.. è ch’omu si senterà menu vergugnosu.
Tutti quelli chì anu pruvatu un ghjornu à parlà corsu sanu quant’ell’hè difficiule postu chì c’hè sempre un aiattolà di a lingua sopr’à locu per criticà !
- Annantu à Murescu, quand’omu ricevi una dumanda d’amicizia, s’hà dui pussibulità : « accittà » è « mancu per ride »… Quì, si vedi chì a risa è a macagna sò elementi di primura…
Ha iè ! A macagna hà una piazza maiò in u spiritu corsu. Dunque ci vulia à falli una piazza ind’è Murescu ! È d’altre macagne sò à ghjunghje… ma pè cunnoscele.. ci vole à scrivesi !
- Qualessi sò i vostri prughjetti è spiranzi pà l’avvena di stu spaziu di sprissioni è di spartera ?
Allora digià, hè previstu un spaziu « impieghi » per prupone o circà impieghi in u mondu sanu.
Serebbe più chè bè ch’un giovanu corsu chì vole vultà in Corsica o viaghjà in America sia in capacità nantu à Murescu di truvà un impiegu qualessu sia u locu di a pianetta duv’ellu vole andà !
Un altru prugettu maiò hè di sviluppà Murescu ghjustappuntu for di Corsica.
Patrick Ottomani, presidente di l’Associu di i Corsi d’America seguita Murescu dapoi u principiu è seranu scritti da quì à pocu i membri di st’associu nantu à u situ. Ci permetterà di cuntrastà cù i nostri cumpatriotti americani !
Per elli, serà una manera d’ùn scurdassi di a filetta ! Vogliu dì di mantene una leia cù a so lingua è soprattuttu cù u so populu !
In Parigi è in altrò, ci sò usterie, caffè duve i Corsi anu un piacè tamantu à ritruvassi, à adduniscesi… Avà averanu ancu Murescu da mantene sta leia in casa… È Diu sà ch’in ‘ssi tempi scuri… in casa… ci simu spessu !
Brandon Andreani
