• Le doyen de la presse Européenne

Maschere : u bellu sustegnu di e donne d’Eccica è Suarella

Quandu hè statu principiatu u cunfinamentu, di marzu scorsu, unepoche di donne di a cumuna d’Eccica è Suarella si sò impegnate à prò di l’anziani. Una demarchja, prestu, allargata à tuttu u paese è aldilà. Per sbuccà, à a fine, nantu à 1500 maschere…
À l’iniziu, ci era un’idea. Quella di Thérèse Malu, abitante d’Eccica è Suarella. Semu à metà di u mese di marzu, u cunfinamentu vene di principià è s’è oghje, e maschere si trovenu da per tuttu (ancu ind’e stazzione d’essenza !), eranu poche à l’epica. In e cumune di u mondu rurale, induve campanu assai persone anziane, ci era un’inchietudine. « Ci vulia à fà prestu per sustegne i nostri anziani, spiega Thérèse Malu, prima quelli in giru à e nostre famigle. Tandu, aghju pigliatu cuntattu cù Yannick Pellegrinetti, a me cugnata è Marie Jo Bacchiolelli a me cugina. Ci era una dumanda di a merria per l’Epahd di Cavru chì era in cercà di maschere. Avemu travagliatu monda. À pocu à pocu, a squadra s’hè allargata. »

Di fattu, ci vulia à truvà stracci, linzoli, vechje magliette ecc. Per fà e maschere. È dopu, lavà, taglià, cosge, stirà è in fine, purtà u tuttu à a ghjente. Pian’pianinu, s’aghjustanu d’altre donne (Cathy R., Marie Do, Manou, Caroline, Cathy S., Anne, Dany, Anne-Marie…) è l’urganisazione si mette in piazza. « Cathy, un’anziana sartora prufessiunale, s’era messa à dispusizione per cosge. Per ciò chì tocca à l’altre, ci semu spertutu u travagliu… »

Finalmente, duicentu maschere seranu purtate à l’Epadh di Cavru. Ma, in tempu di cunfinamentu, ci vulia à fà casu chì e surtite eranu difese, fora di e necessità. Tandu, sò Francè Pellegrinetti è Antò Bacchiolelli chì sò stati incaricati d’esse l’arricadori.

« Da ottu ore di mane à dece ore di sera »

L’affare si sviluppa assai è a merria mette una sala à dispusizione. Nanzu di passà cumanda. Subbitu, i benevulenti, s’impegnanu à prò, sta volta, di i spinghjifochi di u Pumonte, in Aiacciu. À tempu, e dumande affaccanu da tuttu u paese. Ciò chì custringhje a squadra à travaglià ghjurnate sane. « Certe volte da ottu ore di mane sin’à dece ore di sera, aghjusta Thérèse, senza elastichi, avemu messu sistemi in piazza per chjode e maschere. Avemu dinò, fattu camisgette di pruttezzione per u persunale di l’Uspidale d’Aiacciu… »

Cusì, da u quindeci di marzu sin’à l’ondeci di maghju, è forse appena dopu, 1500 maschere sò state fate da i benevulenti. « Ne ferma unipochi ma l’affare hè guasgi compia. »

Una manera di mustrà chè a sulidarità esiste sempre ind’i nostri paesi…
Partager :